விமான கடத்தல்

ஆகஸ்ட் மாதம் 15-ம் தேதி 1966ம் ஆண்டு.
இஸ்ரேலிய உளவுத்துறை மொசாத்துக்கு மிக முக்கியமான தினம். மொசாத்தின் தலைவர் அமீட் பேயர் தாமே நேரடியாக தேர்ந்தெடுத்த தினம் அது. எதற்காக? விமானம் ஒன்றை கடத்துவதற்காக!
அன்றைய தினத்தில் மிக்-21 ரக விமானம் ஒன்று மொசாத்தின் திட்டமிட்டபடி ஈராக்கிலிருந்து இஸ்ரேல்வரை கடத்தப்பட வேண்டும். விமானம் ஈராக் நாட்டு விமானப் படைக்கு சொந்தமானது.
மொசாத் சுமார் 8 மாதங்களாக போட்ட திட்டம் இது. ஈராக் விமானப் படையின் விமானி ஒருவரை அணுகி, அவரை வழிக்கு கொண்டு வந்திருந்தது மொசாத். (அதற்காக அனுப்பப் பட்டவர் ஒரு அழகிய பெண்)
ஈராக்கிய விமானிகள் பயிற்சிக்காக மிக்-21 போர் விமானங்களில் பறந்து ஒரு ரவுண்ட் அடித்துவிட்டு இறங்குவது வழக்கம். குறிப்பிட்ட விமானி பயிற்சிக்காக பறக்கும்போது, விமானத்தை அப்படியே ஈராக்குக்கு வெளியே கொண்டுபோய் இஸ்ரேலில் தரையிறக்க வேண்டும் என்பதே திட்டம்.
அதிலும் சின்னதாக தில்லுமுல்லு ஒன்று இருந்தது.
ஈராக் விமானியை வழிக்கு கொண்டுவந்த இளம்பெண், தம்மை சி.ஐ.ஏ.-யின் ஆள் என்று கூறியிருந்தார். “சி.ஐ.ஏ., ஈராக்கின் போர் விமானம் ஒன்றை கடத்த விரும்புகிறது” என்பதே ஈராக் விமானிக்கு கூறப்பட்ட கதைச் சுருக்கம். ஆனால், உண்மையில் அமெரிக்க பிரஜையான அந்த பெண், மொசாத் ஏஜென்ட்.

விமானி முனீர்

ஈராக்கியர்களுக்கு ‘இஸ்ரேல் எதிர்ப்பு’ ரத்தத்திலேயே கலந்து உள்ளது. அதனால், விமானத்தை இஸ்ரேலுக்காக கடத்த வேண்டும் என்று சொன்னால், எந்தவொரு ஈராக்கிய விமானியும் முன்வர மாட்டார். எனவே, சி.ஐ.ஏ.-யின் பெயரை உபயோகித்துக் கொண்டது மொசாத்.
இவர்கள் வழிக்கு கொண்டுவந்திருந்த ஈராக்கிய விமானியின் பெயர் முனீர் ரெட்ஃபா.
திட்டம் என்ன?
விமானம் கடத்தப்பட வேண்டிய தினத்துக்கு முதல்நாள் இரவு, முனீரின் குடும்பத்தினரை ஈராக்கில் வைத்து சி.ஐ.ஏ. (என்று சொல்லப்பட்ட மொசாத்) பொறுப்பேற்றுக் கொள்ளும். இரவோடு இரவாக அவர்கள் ஈராக்கில் இருந்து ‘எப்படியோ’ வெளியே கொண்டு செல்லப்படுவார்கள். அவர்கள் வெளியேறுவது, பக்கத்து வீட்டில் வசிப்பவர்களுக்கு கூட தெரியவராது.
முனீர் மறுநாள் வழமைபோல ஈராக்கிய விமானப்படை தளத்துக்கு பணிக்கு செல்ல வேண்டியது. பயிற்சிக்காக விமானத்தில் ஏறி பறக்க வேண்டியது. விமானம் ஈராக் வான் எல்லைக்கு வெளியே வந்ததும், எங்கே தரையிறக்க வேண்டும் என்று விமானத்தின் ரேடியோவில் தகவல் வரும்.
தரையிறங்கும் இடத்தில் மற்றொரு விமானம் காத்திருக்கும். முதல்நாள் இரவு ஈராக்கில் இருந்து வெளியேறிய குடும்பத்தினர் அதில் இருப்பார்கள். விமானம் நேரே அமெரிக்கா செல்லும். அங்கே வசிப்பதற்கு அனைத்து ஏற்பாடுகளும் தயாராக இருக்கும்.
ஈராக்கை விட்டு யாரும் வெளியேற அனுமதிக்கப்படாத நாட்களில், இந்த ஏற்பாடு முனீருக்கு பிடித்திருந்தது. ஈராக்குக்கு உள்ளே சர்வாதிகார ஆட்சி மற்றும் அதீதமான கட்டுப்பாடுகள் பிடிக்காத காரணத்தால், அங்கிருந்து எப்படியாவது வெளியேறி விட வேண்டும் என்ற எண்ணத்தில் இருந்த முனீர், இதற்கு சம்மதித்திருந்தார்.
திட்டப்படி, முதல்நாள் இரவு சி.ஐ.ஏ. ஏஜென்டுகள் என தம்மை அறிமுகப்படுத்திக் கொண்ட இருவர் வந்து முனீரின் குடும்பத்தினரை வேன் ஒன்றில் அழைத்துச் சென்றிருந்தனர். மறுநாள் காலை, வழமையாக பணிக்குச் செல்லும் நேரத்தில் வீட்டை விட்டு கிளம்பினார் முனீர்.
கிளம்பும்போது, இந்த வீட்டுக்கு மறுபடியும் வரப்போவதில்லை என்று நினைத்துக் கொண்டு, கடைசித் தடவையாக வீட்டை ஒருமுறை திரும்பிப் பார்த்துவிட்டு, புறப்பட்டார்.
விமானி முனீர் விமானப்படைத் தளத்துக்குள் நுழைந்தபோது எதுவும் அசாதாரணமாகத் தென்படவில்லை. அவரது குடும்பத்தினர் அனைவரும் ஈராக்கைவிட்டுத் தப்பிச் சென்ற விஷயம் இன்னமும் ஈராக் பாதுகாப்புப் படையினருக்கு தெரிந்திருக்கவில்லை.
ஆனால், எந்த நிமிடமும் அது தெரியவரலாம்.
தெரிந்து விட்டால் முனீர் மிக்-21 விமானத்தில் ஏறுவதற்கு முன்னரே கைது செய்யப்படுவார். தொடர்ந்து சித்திரவதை காத்திருக்கும். இறுதியில் உயிரை விட வேண்டியிருக்கும்.

தாம் விமானத்தை கடத்தப் போகும் விஷயம் தெரிந்துவிட்டதா என்று உள்ளே பதட்டமாக இருந்தாலும், அதை வெளியே காண்பிக்காமல் இயல்பாக இருந்தார் விமானி முனீர்.
விமானப் படையின் கன்ட்ரோல் ரூமுக்குச் சென்று, அவருக்குரிய பிளைட்-பிளானை (flight plan) பெற்றுக் கொண்டார். அப்போதுதான் கொஞ்சம் பயம் ஏற்பட்டது. காரணம் இவருக்கு கொடுக்கப்படும் பிளைட்-பிளான் எப்படிப்பட்ட பிளைட்-பிளானாக இருக்க போகின்றது என்பது அது கையில் கிடைக்கும்வரை தெரியவராது.
அந்த பிளைட்-பிளானில்தான் தங்கியிருக்கிறது, விமானம் கடத்தப்படுவதற்கான சாத்தியம்.
ஏன் அப்படி என்பதை இந்த இடத்தில் கொஞ்சம் சுருக்கமாகச் சொல்லிவிடுவது நல்லது. அதிகம் டெக்னிகலாக இல்லாமல், இலகுவாக சொல்கிறோம்.
எந்தவொரு விமானப் படையிலும், பயிற்சி விமானிகளுக்குக் கொடுக்கப்படும் பிளைட்-பிளான்களில் long-8, Short-8 என்று இரண்டு ரகம் உண்டு. இரண்டுக்கும் இடையே என்ன வித்தியாசம்? பறக்கப் போகும் உயரமும், சென்று திரும்பவுள்ள தொலைவும்!
இதில் 8 என்ற இலக்கம் எதற்கு என்றால், இந்த பிளைட்-பிளான்களில் கொடுக்கப்படும் பறக்கும் பாதை ‘8’ என்ற வடிவில் இருக்கும். 8 வடிவத்தின் நடுப்புள்ளிதான் விமானம் புறப்படும் விமானத்தளம்.
ஒரு முறை தரையிலிருந்து புறப்பட்ட விமானம் ஒரு திசையில் போய், ஒரு வட்டமடித்து திரும்பி வரும்போது, புறப்பட்ட விமானத் தளத்துக்கு மேலால் பறக்கும். அதை கடந்து போய் மீண்டும் ஒரு வட்டமடித்து திரும்பினால், பழையபடி விமானத் தளத்தின் ரன்வேயில் வந்து இறங்கும். இந்த பிளையிங் பட்டர்ன் இலக்கம் ‘8’ போல உள்ளது அல்லவா? அதுதான் long-8, Short-8 என்ற பெயர்கள்
இதில் Short-8 என்பது குறைந்த தூரத்திலேயே வட்டமடிப்பை செய்வது. அப்படிச் செய்யும்போது பறக்கும் தூரமும் குறைவாக இருக்கும். அதிக உயரத்துக்கு மேலேறும் அளவுக்கு நேரமும் போதாது. Long-8 இதற்கு நேரெதிர்.
விமானத்தை கடத்த திட்டமிட்டுள்ள முனீருக்கு, Short-8 பிளைட்-பிளான் கொடுக்கப்பட்டிருந்தால் கடத்தல் திட்டமே, கோவிந்தா!
ஏனென்றால் Short-8 பிளைட்-பிளானில், செல்ல வேண்டிய தூரமும், உயரமும் குறைவு என்பதால், எரிபொருளின் அளவும் குறைவாகவே தேவைப்படும். Short-8 பறத்தலை முடித்துக் கொண்டு விமானம் மீண்டும் ரன்வேக்கு வரும்போது, டேங்கில் எரிபொருள் அதிகமிருந்தால், அந்த எரிபொருளின் எடை, விமானத்தின் அதிகபட்ச இறங்கும் எடையைவிட (Maximum landing weight) அதிகமாக இருக்கும்.
அப்படி இருந்துவிட்டால் ஆபத்து. தரையிறங்கும் வேகத்தோடு, இந்த எடையும் சேர்ந்து, விமானத்தை ரன்வேயுடன் மோத வைத்துவிடும்.
மேலே கூறப்பட்டவை உங்களுக்குப் புரிந்திருந்தால் விசேஷம். புரியாவிட்டால் பரவாயில்லை. இப்படிப் புரிந்து கொள்ளுங்கள் – அன்றைய தினம் முனீருக்கு குறைந்த தூரம் பறப்பதற்கான பிளைட்-பிளான் கொடுத்தால், விமானத்தில் எரிபொருள் குறைவாகவே நிரப்பப்பட்டு கொடுக்கப்படும்.
முனீரின் திட்டம் விமானத்தை ஈராக்கை விட்டுக் கடத்துவது. அதற்கு, மிக்-21 விமானத்தின் டேங்கில், குறைந்தபட்சம் 40% எரிபொருள் இருக்க வேண்டும். இல்லாவிட்டால் ஈராக் எல்லைகளைத் தாண்டும் முன்னரே, விமானத்தில் எரிபொருள் தீர்ந்துவிடும்.
Short-8 பிளைட்-பிளான் என்றால், டேங்கில் 20-25% எரிபொருள் நிரப்பி கொடுத்து விடுவார்கள். இதுதான் கடைசித் தடை.
முனீர் கொஞ்சம் பயத்துடனே தனக்குக் கொடுக்கப்பட்ட பிளைட்-பிளானை வாங்கிப் பார்த்தார். அன்று அதிஷ்டம் அவருக்கும், இஸ்ரேலுக்கும் இருந்தது. முனீருக்கு கொடுக்கப்பட்ட பிளைட் பிளான், Long-8!
அதைப் பெற்றுக் கொண்டு விமானத்துக்குள் ஏறினார். முதல் வேலையாக பைலட் சீட்டுக்கு இடதுபுறமுள்ள எரிபொருள் இன்டிகேட்டர் மீட்டரை பார்த்தார். விமானத்தில் சுமார் 55 சதவிகித எரிபொருள் நிரப்பப்பட்டிருந்தது.
அது போதுமானது. விமானத்தை ஈராக்கை விட்டு கடத்திச் செல்ல தாராளமாக போதுமானது!
இதோ, ஈராக்கிய மண்ணில் அவரது இறுதி நிமிடங்கள். ஈராக் பாதுகாப்பு படையினருக்கு, முனீரின் குடும்பம் மிஸ்ஸிங் என்ற தகவல் இப்போது தெரியவந்தாலும், அவரது விமானம் புறப்படுவதற்கு கிளியரன்ஸ் கிடைக்காது!
விமானத்திலிருந்து கன்ட்ரோல் டவரைத் தொடர்பு கொண்ட முனீர், Take-off Clearence கேட்டார்.
உடனே கிடைத்தது. “ஆகா.. இவர்களுக்கு இன்னமும் விஷயம் தெரியவரவில்லை”
உடனே விமானம் கிளம்பி, வேகம் பிடித்து, ரன்வேயில் ஓடி மேலேறியது… ஈராக்கின் தரையைவிட்டுக் கடைசித் தடவையாக!
முனீருக்கு கொடுக்கப்பட்டிருந்த பிளைட்-பிளானின்படி அவர் பறந்த திசை, ஈராக்-துருக்கி எல்லையிலிருந்து சுமார் 10 பாகை விலகிய பாதை. கீழேயிருப்பவர்களுக்குச் சந்தேகம் ஏற்படாதபடி அந்தப் பாதையில் பறந்தார். பிளைட்-பிளானின்படி, முதலாவது 45 பாகை திரும்ப வேண்டிய இடத்துக்கு அருகே வந்தபோது, திரும்பவில்லை. தொடர்ந்தும் சில நிமிடங்கள் பறந்து, உயரத்தை அதிகரித்து, 10 பாகை எதிர்புறமாகத் திரும்பி, துருக்கி நாட்டு எல்லையை நோக்கி பறக்க துவங்கினார்.

முனீர் செலுத்திய விமானத்தின் நகர்வை ஈராக்கின் தரை எல்லைப்புற கட்டுப்பாட்டு மையம் ஒன்றின் ரேடாரில் பார்த்துக் கொண்டிருந்தவர்கள் குழம்பிப் போனார்கள். தரையிலிருந்து விமானத்துக்கு ரேடியோ தொடர்பை ஏற்படுத்த முயன்றார்கள்.

இதுதான், ஆகஸ்ட் மாதம் 15-ம் தேதி 1966-ல் கடத்தப்பட்ட விமானம்.

முனீர் பதிலளிக்கவில்லை.
கொஞ்சம் தாமதமாகத்தான் கீழேயிருந்த ஆட்களுக்கு நடக்கும் விபரீதம் புரிந்தது. அதற்குள் முனீரின் விமானம் துருக்கி எல்லைக்கு மிக அருகில்  பறந்து கொண்டிருந்தது.
துருக்கிக்கு அருகிலுள்ள ஈராக்கின் எல்லை ராணுவ முகாம் ஒன்றில் விமான எதிர்ப்புப் பீரங்கிகள் இருந்தன. ஆனால் அவை சுடக்கூடிய ரேஞ்சைவிட அதிக உயரத்துக்கு விமானத்தை உயர்த்தி விட்டிருந்தார் முனீர். எனவே, தரையில் சுடுவதால் பலனில்லை.
கீழே உள்ளவர்களுக்கு இருந்த ஒரேயொரு வழி, வேறு போர் விமானங்களை அனுப்பி, வானில் வைத்து முனீரின் விமானத்தைத் தாக்குவது.
அதையும் அவசர அவசரமாக முயன்றது ஈராக் விமானப்படை.
உடனடியாக ஈராக் விமானப்படையின் இரண்டு போர் விமானங்கள் வானத்துக்கு அனுப்பப்பட்டன. அவை மேலேறி முனீரின் விமானத்தை சுடக்கூடிய தூரத்தில் நெருங்குவதற்கு முன்னர், முனீரின் விமானம் ஈராக்கின் வான் எல்லையைக் கடந்து, துருக்கி நாட்டு வான் எல்லைக்குள் பிரவேசித்தது.

ஆபரேஷனை திட்டமிட்டு, வெற்றிகரமாக முடித்த இஸ்ரேலிய உளவுத்துறை மொசாத் தலைவர் அமிட் மெய்ரின் இளமைத் தோற்றம்.

துரத்திச் சென்ற இரு விமானங்களும் துருக்கி எல்லைக்குள் நுழையாமல், ஒரு வட்டமடித்து, மீண்டும் ஈராக்குக்குள்ளே திரும்பிச் செல்ல வேண்டியதாகி விட்டது.
துருக்கி நாட்டுக்குள் மிக்-21 விமானம் நுழைந்த மூன்றாவது நிமிடமே, வேறு இரு போர் விமானங்கள் தனது இடது புறமும் வலது புறமும் நெருங்கி  பறக்கத் துவங்கியதை முனீர் பார்த்தார். ஒருவேளை ஈராக் விமானப்படை விமானங்கள்தான் இன்னமும் துரத்துகிறார்களோ என்று உற்றுப் பார்த்தால், இரு புறமும் வந்த விமானங்கள் இஸ்ரேலிய விமானப்படையின் விமானங்கள்.
அவை முனீரின் விமானத்துக்குப் பாதுகாப்பு கொடுத்து, முனீரை திசை திரும்பச் செய்து, துருக்கியின் விமானப் படைத் தளமொன்றில் தரையிறங்கும்படி சிக்னல் கொடுத்தன.
அந்த லேன்டிங், முனீருக்கும் அவசியமாக இருந்தது. அதிக உயரத்திலும், பிளைட் பிளானைவிட அதிக தூரத்துக்கும் பறந்ததால், அவரது விமானத்திலிருந்த எரிபொருள் கணிசமாகக் குறைந்து போயிருந்தது. எனவே அவரும் தனது விமானத்தை, துருக்கி விமானப் படைத் தளத்தில் இறக்கினார்.
அங்கே ஏற்பாடுகள் கனகச்சிதமாகச் செய்யப்பட்டடிருந்தன. இவரது விமானம் ரன்வேயில் ஓடி நிறுத்தப்பட்டதும், துருக்கி விமானப் படையைச் சேர்ந்தவர்கள் எதுவித கேள்வியும் இல்லாமல் விமானத்துக்கு எரிபொருள் நிரப்பினார்கள்.
அதுவரை அமைதியாக இருந்த ரேடியோ உயிர்பெற, துருக்கியிலுள்ள அமெரிக்க ராணுவ முகாமிலிருந்து பேசுவதாக ஒரு குரல் கூறியது. விமானத்தை டேக்-ஆஃப் செய்து, இஸ்ரேலின் வான் எல்லைக்குள் செல்லும்படி கூறினார்கள்.

மொசாத் உளவுத்துறையில் இருந்து ஓய்வுபெற்றபின், வயதான தோற்றத்தில் அமிட் மெய்ர். (இடதுபுறம் இருப்பவர்)

விமானம் ஈராக்கில் இருந்து கடத்தப்படுவது அமெரிக்காவுக்காக என்றுதான் முனீர் அதுவரை நினைத்திருந்தார். துருக்கியில் எரிபொருள் நிரப்பப்பட்ட பின்னர், ஐரோப்பிய நாடு ஒன்றிலுள்ள அமெரிக்க விமானப்படை தளத்துக்கு வரச் சொல்லுவார்கள், அங்கே வைத்து விமானத்தை அமெரிக்கர்கள் எடுத்துக் கொள்வார்கள் என்றுதான் அவர் நினைத்துக் கொண்டிருந்தார்.
அமெரிக்கர்களுக்கு, ரஷ்ய தயாரிப்பான மிக்-21 பரிச்சயமில்லாத விமானம். எனவே, சில வேளைகளில் விமானத்தை ஓரிரு நாட்களின் பின்னர் தம்மையே அமெரிக்கா வரை செலுத்தும்படி கேட்டுக் கொண்டாலும் ஆச்சரியப் படுவதற்கில்லை என்றும் ஒரு எண்ணம் அவரிடம் இருந்தது.
இரண்டும் இல்லாமல், விமானத்தை இஸ்ரேலிய வான் எல்லைக்குள் கொண்டு செல்லும்படி கூறியது, முனீருக்கு ஆச்சரியத்தைக் கொடுத்தது.
ஒருவேளை இந்த விவகாரத்தை அதி ரகசியமாக வைத்துக் கொள்ள விரும்பிய அமெரிக்கர்கள், தங்களது ஐரோப்பிய விமானத் தளங்கள் எதையும் இதற்காக உபயோகிக்க விரும்பவில்லையோ? அமெரிக்கர்களும், இஸ்ரேலியர்களும் நண்பர்கள் என்பதால், இஸ்ரேலிய போர் விமானங்கள் பாதுகாப்பு கொடுக்கின்றனவோ என்று நினைத்துக் கொண்டார்.

இவர்தான் ஈராக்கிய விமானி முனிர். மேலே இருப்பது, அவர் விமானத்தை கடத்திய நாட்களில் எடுக்கப்பட்ட போட்டோ. கீழேயுள்ளது 1998-ல் அவர் இறப்பதற்கு சில மாதங்களுக்கு முன் எடுக்கப்பட்ட போட்டோ.

எப்படியும் அவருக்கு வேறு சாய்ஸ் எதுவும் இருக்கவில்லை. ஈராக்கை விட்டு வெளியே வந்தாகி விட்டது. அதுவும் சும்மா வரவில்லை. ஒரு விமானத்தைக் கடத்திக் கொண்டு வந்தாகி விட்டது. குடும்பத்தினரையும் இவர்களை நம்பி ஒப்படைத்தாகி விட்டது. இனி, இவர்கள் சொல்வதைக் கேட்பதைத் தவிர வேறு வழியில்லை.
துருக்கி விமானத் தளத்திலிருந்து முனீரின் விமானம் கிளம்பி, இஸ்ரேலை நோக்கிப் பறக்கத் தொடங்கியது. மீண்டும் இரு இஸ்ரேலிய விமானப் படையின் போர் விமானங்கள் இருபுறமும் பாதுகாப்பு கொடுத்தபடி பறந்து வந்தன.
முனீர் செலுத்திய மிக்-21 விமானம் இஸ்ரேலிய வான் எல்லைக்குள் நுழைந்தபோது, மீண்டும் விமானத்திலிருந்த ரேடியோ உயிர் பெற்றது.
“வெல்கம் டு இஸ்ரேல். உங்கள் குடும்பத்தினர் உங்கள் வருகைக்காக இங்கே ஆவலுடன் காத்திருக்கிறார்கள்.”
அடுத்த அரைமணி நேரத்தில் முனீர் செலுத்திச் சென்ற விமானம் இஸ்ரேலின் வடபகுதியிலுள்ள விமானப்படைத் தளம் ஒன்றில் தரையிறங்கியது.
அந்த நிமிடத்திலிருந்து இஸ்ரேல், மத்திய-கிழக்கு நாடுகளிடையே ராணுவ ரீதியில் பலமான ஒருநாடாக மாறியது. மொசாத் என்ற உளவு அமைப்பை மற்றய நாட்டவர்கள் பிரமிப்புடன் பார்க்கத் தொடங்கினார்கள்.
மொசாத் உளவுத்துறைக்குள் இந்த ஆபரேஷனை திட்டமிட்டு, வெற்றிகரமாக முடித்துக் கொடுத்த Amit Meir, மொசாத்தின் சர்வ வல்லமை பொருந்திய தலைவராக வளரத் துவங்கினார்.
விமானத்தைக் கடத்திவந்த முனீருக்கு, விமானம் கடத்தப்பட்டது அமெரிக்காவுக்காக அல்ல – இஸ்ரேலுக்காக என்று தெரியவந்தபோது ஆரம்பத்தில் கொஞ்சம் கோபப்பட்டார். ஆனால் இஸ்ரேலியர்கள், முனீரைச் சமாதானப்படுத்தி விட்டார்கள். அவர்களுக்கும் முனீர் தேவைப்பட்டார் – அவர்களிடம் மிக்-21 விமானத்தில் பயிற்சி பெற்ற விமானிகள் யாருமில்லாத காரணத்தால்!
மொசாத்தின் உதவியுடன் இஸ்ரேலில் குடும்பத்துடன் குடியேறினார் முனீர்.
அவருக்கு மாதாமாதம், ஒரு இஸ்ரேலிய விமானப்படை விமானிக்கு கொடுக்கப்படும் அளவிலான ஊதியம், அவர் ஓய்வு பெறும்வரை வழங்கப்பட்டது. அதன்பின் ஓய்வூதியம்! கடந்த 1998-ல் இஸ்ரேலில் இயற்கை மரணமடைந்தார் முனீர்.

முடிந்தது  -----


நன்றி --ரிஷி